واتساب بزنس API/المدارس والمعاهد ومراكز التدريب
للمدارس والحضانات والمعاهد
للمدرسة أو الحضانة أو المعهد في الكويت، واتساب بزنس API يعطي التسجيل والحسابات والمدرسين رقم رسمي واحد: الاستفسارات ينرد عليها بالعربي أو الإنجليزي، واختبارات تحديد المستوى تنحجز داخل المحادثة، وتذكيرات الأقساط توصل لكل ولي أمر على خاص مع رابط الدفع. نركّبه لك على Gallabox مجاناً، بقوالب ما تحط بيانات أي طالب في رسالة جماعية.
إحنا شريك لـ Gallabox. نبيع باقات Gallabox بنفس أسعارها المعلنة في الكويت ودول الخليج، ونركّبها مجاناً.
المشكلة الحقيقية
المدارس والمعاهد في الكويت تتواصل مع أولياء الأمور بثلاث أماكن بنفس الوقت: قروبات واتساب للفصول تندار من جوالات المدرسين الشخصية، ورسائل SMS من نظام المدرسة، ورقم تسجيل ترد عليه موظفة وحدة. وبموسم التسجيل وقبل الاختبارات تتكدس الأسئلة عن الرسوم والمقاعد والباصات، وولي الأمر اللي يبي اختبار مستوى يروح لمكان ثاني، وتذكيرات الأقساط تنرسل يدوي، متأخرة أو لولي أمر غلط. وبنفس الوقت، كل واحد بالقروب يشوف أرقام باقي أولياء الأمور.
بموسم التسجيل نفس الأسئلة تتكرر طول اليوم: أي صفوف فيها مقاعد، وكم الرسوم، وشنو المنهج، وفيه باص ولا لا. المسار يسأل عن صف الطالب وموعد البداية، ويجاوب الأسئلة المعتادة، ويحوّل ولي الأمر للتسجيل والتفاصيل جاهزة.
هلا فيكم في [اسم المدرسة]. عن أي صف تسألون، ولأي سنة دراسية؟ فريق التسجيل بيرد عليكم بالمقاعد المتوفرة والرسوم.
ولي الأمر يختار جولة بالمدرسة أو حصة تجريبية أو اختبار تحديد مستوى، وبعدها اليوم والوقت، من أزرار. ويوصله تأكيد فيه اللوكيشن وشنو يجيب معاه، وتذكير قبلها بيوم، عشان موعد الاختبار ما يروح على الفاضي.
تم حجز اختبار تحديد المستوى لـ {{1}} يوم {{2}} الساعة {{3}}، في فرعنا بـ {{4}}. أرسل 2 لتغيير الموعد.
تنبيهات الغياب، والانصراف المبكر، وتأخير الباص، ومواعيد رمضان، تنرسل من رقم المدرسة لكل ولي أمر بدل SMS أو قروب الفصل. وأي شي يخص طالب واحد يروح بس لولي أمره، والرد يرجع للمدرسة، مو لكل القروب.
عزيزي ولي الأمر، تم تسجيل غياب {{1}} يوم {{2}}. ياليت تردون علينا بسبب الغياب.
الأيام المفتوحة والبرامج الصيفية والدفعات الجديدة تنرسل بس لأولياء الأمور والطلاب اللي اشتركوا، مو لقروب فصل كامل. قسّم القائمة حسب العمر أو المستوى عشان ولي أمر طفل الروضة ما يوصله إعلان دورة IELTS، وخل الأسماء والدرجات برا الرسالة.
دورة {{1}} تبدأ يوم {{2}}، والحصص أيام {{3}}. أرسل 1 عشان تحجز اختبار تحديد المستوى. أرسل إيقاف لإلغاء الاشتراك.
مركز الدروس أو الحضانة اللي فيها موظفة وحدة ماسكة الاستفسارات براحة، يقدر يظل على تطبيق واتساب بزنس المجاني: حط رسالة غياب فيها أوقات الدوام، وردود سريعة للرسوم والمواعيد والموقع، وكتالوج بالدورات، وتصنيفات للاستفسار والحصة التجريبية والمسجّل والرسوم المستحقة. انتقل للـ API لما التسجيل والحسابات يحتاجون نفس الرقم، أو لما التذكيرات لازم توصل لأولياء أمور مرحلة كاملة بوقتها، أو لما الرسائل تجي أسرع من إن شخص واحد يلحق عليها.
ولي الأمر ما لازم يحتاج رقم المدرّس الشخصي عشان يوصل للمدرسة. في الصندوق المشترك، التسجيل يمسك الاستفسارات، والحسابات تمسك الرسوم، والأسئلة عن فصل معيّن تتحوّل لمدرّس هالفصل ويرد من رقم المدرسة. كل محادثة لها مسؤول واحد وملاحظاتها، فولي الأمر ما يعيد كلامه مرتين، والمدرّس اللي يطلع ما ياخذ معاه أي محادثة مع أولياء الأمور.
الدفع داخل واتساب من ميتا مو متوفر في الكويت، فدفع الرسوم بالواتساب يعني رابط كي نت أو بطاقة من بوابة الدفع — ماي فاتورة أو تاب أو يو بيمنتس أو البنك. أرسله لولي الأمر على خاص مع الفصل الدراسي والمبلغ وتاريخ الاستحقاق، ولا ترسله أبداً في قروب الفصل. وبالتسجيل، رابط عربون المقعد في رسالة القبول يحوّل الموافقة لمقعد محجوز. وسجّل منو دفع في نظام المدرسة أو في شيت، عشان محد يوصله تذكير برسوم دفعها.
أقساط الفصل، وباقات الدروس الشهرية، وتجديد الدورات تضيع لما محد يتابعها. أرسل تذكير خدمة واحد قبل تاريخ الاستحقاق بسبع أيام فيه المبلغ ورابط الدفع، وتذكير ثاني بنفس اليوم. بعدها موظف يتابع بنفسه، لأن ولي الأمر اللي ما دفع ممكن عنده سبب يستاهل تسمعه. اسحب تواريخ الاستحقاق من نظام المدرسة إذا يوفر API أو تصدير، أو من Google Sheet، ووقّف التذكيرات أول ما الدفعة توصل.
الرخصة التجارية لتوثيق النشاط في ميتا، والرقم اللي يعرفه أولياء الأمور، واسم المدرسة أو المعهد بالضبط مثل ما تبيه يطلع، ومنو يرد على التسجيل والرسوم وأسئلة الفصول، وأكثر الأسئلة اللي يسألها أولياء الأمور. التوثيق هو الخطوة اللي تطوّل، فابدأ قبل فتح التسجيل أو بداية الفصل الجديد بوقت كافي. وإحنا نبني مسار الاستفسارات وأول القوالب بنفس الوقت.
عد أربع أشياء لمدة شهر قبل وبعد: سرعة أول رد على استفسارات التسجيل، وكم استفسار يتحوّل لجولة أو حصة تجريبية أو اختبار مستوى، وكم قسط للحين ما اندفع بعد تاريخ الاستحقاق، وكم طالب يعيد التسجيل أو يجدد. لا تهتم بعدد الرسائل اللي طلعت. قائمة إرسال كبيرة محد يرد عليها تكلفة، مو نتيجة.
قروبات فصول كل ولي أمر فيها يشوف أرقام الباقين. درجات أو غياب أو ملاحظات سلوك تنرسل بأي مكان غير الخاص مع ولي الأمر. رسائل تروح للطالب بدل ولي أمره. دعوات اليوم المفتوح مكتوبة كأنها تحديثات خدمة، وميتا تعتمدها رسائل تسويقية على أي حال. وتذكيرات أقساط تنرسل للكل، حتى اللي دفعوا — وهذي أسرع طريقة تخلي الناس يحظرون الرقم ويبلّغون عنه.
الرسائل اللي تخص الطالب تروح لولي الأمر، مو للطالب نفسه. خل الدرجات والغياب والأمور الصحية والسلوك برا الرسائل الجماعية والقروبات: أرسلها على خاص لولي أمر الطالب، أو قول إن التقرير جاهز ووجّهه لبوابة المدرسة. والرسائل الترويجية تروح بس لأولياء الأمور اللي وافقوا يستقبلونها. وإذا مدرستك عندها قواعد خاصة للتواصل مع أولياء الأمور، هذي تجي أول.
باقة Gallabox Basic بالدفع السنوي، بنفس سعرها المعلن، مع رسوم على كل رسالة قالب توصل. التفاصيل وأسعار الرسائل في صفحة الأسعار.
قول لنا شنو يصير بمحادثاتك اليوم. نرد بخطة، والتركيب علينا.