شغّل على الكويت كلها أول — الكويت مدينة وحدة
الكويت فيها حوالي ٤٫٩ مليون شخص بمساحة تقطعها بالسيارة بساعة تقريباً. ميتا تشوف البنت اللي بالجهراء والبنت اللي بالسالمية نفس السوق، لأنهم يتصفحون نفس الانستقرام. أول ما تضيّق على منطقة وحدة، الجمهور اللي توصله ينزل غالباً بين ٣٠ و٨٠ ألف شخص. بهالحجم الحملة ما تطلع من مرحلة التعلّم أبد، والتكرار يعدّي ٥ بأول عشر أيام، وتكلفة الطلب تطلع فوق بدال ما تنزل. أغلب حسابات الأزياء الضعيفة اللي تجينا، الجغرافيا فيها مشغّلة من بدري واجد.
ابدأ على الكويت كلها بمجموعة إعلانية وحدة. عطها ٣٠٠–٥٠٠ دينار ومدة أسبوعين لثلاثة، وهذي لأغلب البراندات هني تعني من ٤٠ إلى ١٢٠ طلب — رقم يكفي تقرأ منه شي حقيقي. بعدين افتح تقرير التوصيل بمدير الإعلانات ورتّبه حسب المنطقة. غالباً بتلقى ثلاث أو أربع محافظات ماسكة تقريباً ٧٠٪ من المبيعات والباقي مجرد ضجة. هني بس يصير قرار المنطقة له معنى، وحتى وقتها الحركة الصح تقسيم ميزانية أو إعلان منفصل، مو استبعاد يقص جمهورك نص.
بيانات المناطق تفيدك بالتوصيل والسعر، مو بالاستهداف
التوصيل هو المكان اللي الجغرافيا تكلفك فيه فلوس صج. التوصيل بنفس اليوم داخل العاصمة وحولي والفروانية يكلف أغلب البراندات ١٫٥–٢٫٥ دينار للطلب مع مندوب محلي. الجهراء والأحمدي وأي شي بعد الفحيحيل يزيد نص دينار لدينار ويوم إضافي، ونسبة الطلبات اللي ما توصل برى هالنطاق أعلى بشكل واضح. إذا محافظة تعطيك ٦٪ من الطلبات بس نص مشاكل التوصيل، هذي مشكلة سياسة شحن مو مشكلة استهداف. ارفع حد الشحن المجاني عندها إلى ٢٥ دينار، أو خذ ٢ دينار أجرة، واستمر تعلن لها.
فرق الأسعار بين المناطق موجود بس أقل مما يقولون. من الحسابات اللي ندير لها، متوسط قيمة الطلب بالعاصمة والسالمية وبيان أعلى بحدود ١٥–٢٥٪ من الجهراء وصباح السالم، والدفع عند الاستلام يُطلب أكثر واجد برى النطاق. هذا يفيدك بالتشكيلة اللي تعرضها وبالستوري، مو بمين يشوف إعلانك. وما تقدر تقرأ هالشي إلا إذا كل طلب عنده عنوان وطريقة دفع بمكان واحد — متجر شوبيفاي مربوط بكي نت وتابي يعطيك هالتقرير من أول يوم، أما الطلبات بالخاص والواتساب فما راح تعطيك شي.
استخدم البيانات كإشارة، مو كجدار. بميتا خلّ مجموعة وحدة على الكويت كلها والخوارزمية تدوّر المشترين، وسوّ مجموعة ثانية بـ٢٠–٣٠٪ من الميزانية على أقوى محافظتين عندك بإعلان يذكر التوصيل بنفس اليوم. بسناب أدوات الاستهداف الجغرافي أخشن والجمهور أصغر عمراً، فمستوى الدولة يكون الصح غالباً. راجع التقسيم كل ثلاثة أشهر — رمضان وهلا فبراير وسفر يوليو وأغسطس يحرّكون مصدر طلباتك أكثر واجد من أي تغيير استهداف بتسويه.
البوب-أب والبوتيك هم الاستثناء اللي يستاهل فلوس
البوب-أب أو الترنك شو هو الوقت الوحيد اللي الاستهداف الضيق يستاهل فيه فلوسه. إذا مسوّي ركن يومين بالأفنيوز أو العاصمة مول أو استوديو بالشويخ، شغّل نطاق ٨–١٢ كيلومتر حول المكان لأربع أيام قبل وأثناء، بميزانية ٦٠–١٢٠ دينار وإعلان يذكر الموقع والتواريخ ووين يوقفون السيارة. التكرار من ٤ إلى ٦ عادي هني لأن الحملة قصيرة والعرض ينتهي. وزيد ستوري صبح يوم الحدث، وخلّ موقع الخريطة موجود بكل تصميم.
البوتيك عنده نطاق حقيقي، وهو أصغر مما يتخيل صاحبه — أغلب اللي يدخلون المحل يجون من مسافة ربع ساعة سواقة، فنطاق ١٠ كيلومتر حول السالمية أو معرض بالفنطاس استهداف صادق مو تضييق. بس إذا تبيع أونلاين بعد، افصل الحملتين تماماً. أكثر غلط نشوفه: صاحب محل بحولي وبزنس أونلاين على كل الكويت، يطبّق نطاق المحل على كل شي وبعدين يستغرب ليش الطلبات الأونلاين نصّت. الجغرافيا للمحل، والكويت كلها للموقع.