قبل لا تقارن، اعطِ سلة وزد حقهم
نبدأ بالصراحة. سلة وزد لوحة التحكم عندهم عربية من أول شاشة لآخر تقرير، يعني الموظف بالمخزن والمحاسب يشتغلون عليها من دون ما تترجم لهم. الدعم يرد بالعربي وبنفس توقيتك، وأحياناً على واتساب. وكي نت جاهز من أول يوم — ترفع الرخصة التجارية، يوافقون عليك، وتستلم فلوسك خلال أيام من دون ما تدور على بوابة دفع وتفاوضها. لصاحب متجر ما يبي مشروع تقني على راسه، هذي ميزة حقيقية وما يلغيها أي شي بشوبيفاي.
التكلفة قريبة بس مو نفسها. باقات سلة وزد تطلع تقريباً ١٠٠ إلى ٥٠٠ دينار بالسنة بعد ما تدخل على باقة مدفوعة. شوبيفاي بحدود ١٢ دينار بالشهر على الباقة الأساسية و٣٠ إلى ٣٥ على الوسطى، زايد ٢٠ إلى ٦٠ دينار تطبيقات، زايد بوابة كويتية تاخذ رسوم كي نت ثابتة على كل عملية بحدود مئات الفلوس. وبعد بتدفع مرة وحدة عشان تظبط العربي واتجاه الصفحة على القالب — احسب ١٥٠ إلى ٤٠٠ دينار. لا تصدق أحد يقول لك شوبيفاي أرخص من أول شهر.
قوة شوبيفاي: صفحة دفع تبيع، وتطبيقات، وبيانات تملكها
صفحة الدفع هي المكان اللي تضيع فيه الفلوس. صفحة شوبيفاي من أكثر الصفحات المجرّبة بالتجارة الإلكترونية، وبالكويت تربط كي نت عليها عن طريق تاب أو ماي فاتورة أو يو بيمنتس، ومعاها آبل باي وتابي. بالمتاجر اللي نقلناها، نسبة إكمال الشراء تتحسن عادة نقطتين إلى خمس نقاط — على مبيعات ٢٠٠٠ دينار بالشهر هذي ٤٠ إلى ١٠٠ دينار كنت تخسرها كل شهر وإنت ما تدري. هذا الفرق لحاله يدفع الاشتراك. وإذا إنت بأي حال بتعيد بناء المتجر، افتح المتجر على شوبيفاي وركّب بوابة الدفع قبل لا تلمس التصميم.
بعدين متجر التطبيقات. اشتراكات شهرية، باقات منتجات، طلب مسبق، رسائل واتساب للسلات المتروكة، قوالب عربية باتجاه يمين ليسار، وربط مع شركات التوصيل — تركّبها خلال ساعات بدال ما تدفع لمطوّر ٣٠٠ إلى ٨٠٠ دينار عشان يبني لك وحدة. احسب ٢٠ إلى ٦٠ دينار بالشهر لأربعة أو خمسة تطبيقات، واحذف أي تطبيق ما عدت تستخدمه. القصة مو إن سلة ما عندها تطبيقات، القصة إن العمق مختلف، ونادر توصل لحد يكون الجواب الوحيد فيه إن المنصة ما تقدر.
الشي الثالث هو الملكية والوصول. بيانات الطلبات وقائمة العملاء والأحداث كلها لك — ترسل التحويلات من السيرفر لميتا وقوقل، وتصدّر كل شي، وتشتغل إيميل ورسائل نصية على قائمتك إنت بدال ما تستأجر جمهور من إنستقرام أو طلبات. وخاصية الأسواق بشوبيفاي تعرض نفس المتجر بالدينار والريال والدرهم والدولار. وفي نقطة يستهين فيها الملاك: إذا اختفى مطوّرك بشهر يوليو، بديل شوبيفاي تلاقيه خلال أسبوع ومن أي بلد بالعالم.
نوعين من البائعين بالكويت ما يسوى لهم ينتقلون لشوبيفاي
إذا طلباتك من خمسة إلى خمستعش بالأسبوع، لا تنقل. مشكلتك بالطلب مو بالمنصة. شوبيفاي مع التطبيقات وبوابة الدفع تكلفك ٤٠٠ إلى ١٢٠٠ دينار بالسنة تكلفة ثابتة قبل ما يوصلك طلب واحد، والنقل ياكل من تركيزك ثلاثة إلى ستة أسابيع — نفس الأسابيع اللي تنفعك أكثر لو صرفتها على المحتوى وسناب وإنستقرام وترجيع الزبون اللي عندك يشتري مرة ثانية. خلك مكانك لين توصل تقريباً ٤٠ طلب بالأسبوع أو ٢٠٠٠ دينار بالشهر، وبعدين راجع القرار.
الحالة الثانية هي السعودية. إذا أغلب طلباتك تروح الرياض وجدة مو السالمية وحولي، سلة وزد مبنيين لهذيك السوق — مدى وتمارا وتابي جاهزين، والفوترة الإلكترونية لهيئة الزكاة والضريبة مغطاة، وشركات الشحن السعودية مربوطة، والمشتري السعودي يعرف شكل صفحة الدفع. على شوبيفاي بتعيد بناء هذا كله بتطبيقات وبتظل تصارع قوانين الفوترة. قاعدتنا: إذا أكثر من ٦٠٪ من الطلبات تشحن للسعودية، خلك محلي. وإذا الكويت والخليج هم الأساس، شوبيفاي بيت أفضل لك على المدى الطويل.